日脚如土豆，可炒可炸；生活如诗文，可写可读。

其实，上海人勿喊土豆的，侪叫伊洋山芋。勿过，也有特殊情况，比方讲，土豆色拉，就没人叫伊洋山芋色拉；又比方，土豆泥，啥人会得叫伊洋山芋泥呢？所以，方言也勿是铁板一块，也是有人文内涵的，也是与时俱进的。就像大饼油条，顶早是移居到上海生活的苏北人喊出来的，上海人接受苏北人的同时也接受了苏北方言，该称大（dà）饼绝勿言大（dù）饼。一只急转弯到此地：“拿土豆做成一首诗”迭句，也算名正言顺的上海闲话。

(资料图片)

搿天早浪，烟雨蒙蒙当中，春寒已经一点点散了，出去散步，发觉，路旁边一棵白玉兰突然就开得灿烂，白得通透。唉，上海市花，也真真跟上海蛮贴。感慨毕，擦肩而过一个四五十岁女人，长得好看，像玉一样淡幽幽，看伊就用马甲袋拎仔一只洋山芋，应该是刚刚从小区里“临时菜篮子工程”买好小菜。等伊走远，立定回过头再看伊一眼，暗黜黜又感慨，唉，迭个日脚，勿算诗意，勿过，笃笃定定。想想呀，呒没笃笃定定的日脚，诗意要伊做啥？勿过，还真的有人拿土豆做成一首诗的，闲时翻翻书，焦桐的《蔬果岁时记》里，有一首诗就是记培根煎马铃薯的，马铃薯是洋山芋的另一个叫法：

马铃薯切得很细/焦得漂亮，互相粘在一起/放进嘴里会有爽脆的口感/晚上洗净马铃薯放在锅子里/注入充分的水，放进一匙盐巴开火/煮到稍微有点硬，熄火沥干水分/趁热立刻剥皮/再放入锅内、覆上锅盖，放在阴凉的地方/让它休息/早晨，把它切成小块，使用煎过培根的油/用焦香土豆条算命吧/如果味道很棒，你可以过很棒的一天。常常有人讲，哦哟，侬拿日脚过成了诗。辣诗人眼睛里，诗一样的日脚无非就是：无意当中走进一条弄堂，碰着一家咖啡馆，一杯咖啡，煎得老美好的培根肉搭仔土豆条。好日脚其实勿复杂。

搿两天，买菜辰光搭送了两只洋山芋，看上去有点灰剥落托，灵机一动，索介就照了焦桐的方法，买了黄油、培根、干贝酱做辅料，炒一盆培根洋山芋，让两只洋山芋有一次脱胎换骨的机会。两只洋山芋削皮切丁，水里浸10分钟沥干；开油镬，加黄油化开，炒香培根片、洋葱丁，再加入洋山芋丁，小火煸到软，再加点干贝酱，翻炒，小火慢慢煨到洋山芋入味，加盐合好咸淡，最后撒葱花提香，出锅。成勿成诗，各人眼光勿同，不过，迭能一碟下饭菜，肥笃笃，香喷喷，是好日脚的味道。（

沈一珠

文并图）

‍

‍

标签：

责任编辑：